ദി റോഡ് നോട്ട് ടേക്കന്‍

"എന്തിന്നധീരത? ഇപ്പോള്‍ തുടങ്ങുവിന്‍ , എല്ലാം നിങ്ങള്‍ പഠിയ്ക്കേണം, തയ്യാറാകണമിപ്പോള്‍ തന്നെ, ആജ്ഞാ ശക്തിയായ് മാറീടാന്‍ ................"പട്ടിണി ആയ മനുഷ്യാ നീ പുസ്തകം കൈയ്യിലെടുത്തോളൂ ..................."

ആയിരത്തി തൊള്ളായിരത്തി എണ്‍പത്തി അഞ്ചു കാലഘട്ടം. പരിഷത്തിന്റെ ശാസ്ത്ര കലാ ജാഥകള്‍ കലായങ്ങളെ പ്രകമ്പനം കൊള്ളിച്ചു മുന്നേറുന്നു. പൊതുവെ പഠനത്തില്‍ മോശമായിരുന്ന വിദ്യാര്‍ത്ഥികളെ പരിഷത്തിന്റെ മുദ്രാവാക്യങ്ങള്‍ കുറച്ചൊന്നുമല്ല സ്വാധീനിച്ചത്. പഠനത്തില്‍ മാത്രം ശ്രദ്ധ കേന്ദ്രീകരിച്ചിരുന്ന പുസ്തക പുഴുക്കളെയും രാഷ്രീയത്തിന്റെ ബാലപാഠം പോലുമറിയാത്ത നല്ലൊരു ശതമാനം ആവറേജ് വിദ്യാര്‍ത്ഥികളെയും ഇടതു പ്രത്യയ ശാസ്ത്രത്തോട്‌ അടുക്കാന്‍ ശാസ്ത്ര സാഹിത്യ പരിക്ഷത്തിന്റെ ഇത്തരം കലാപ്രകടനങ്ങള്‍ വളരെ അധികം പ്രയോജനപ്പെട്ടു.

മുന്‍ ജന്മ സുകൃതമോ ഈ ജന്മ സുകൃതമോ അയ്യപ്പ സ്വാമിയുടെ അനുഗ്രഹമോ എന്താണെന്നറിയില്ല പരിഷത്തിന്റെ പ്രചാര തന്ത്രങ്ങളെ അതിജീവിയ്ക്കാനും കാമ്പസ് ജീവിതം എന്നാല്‍ മുഷ്ടി ചുരുട്ടി ശൂന്യതയില്‍ പ്രഹരിയ്ക്കല് മാത്രമല്ലെന്ന് മനസ്സിലാകുവാനും ഉള്ള വിവേകം ഞങ്ങളിലെ ചിലര്‍ക്കെങ്കിലും ഉണ്ടായിരുന്നു. അതുകൊണ്ട് തന്നെ താടി വെച്ച നേതാക്കന്മാരുടെ തീപ്പൊരി പ്രസംഗത്തിലും കൂടുതല്‍ താല്‍പ്പര്യം ഞങ്ങള്‍ക്ക് കോളേജിന് ഒരു കി. മീ അകലെയുള്ള കള്ള് ഷാപ്പിലെ കാട- കള്ള് സേവയിലായിരുന്നു. എത്ര മനോഹരമായിരുന്നു ആ നല്ല ഇന്നലെകള്‍! "ദ പാത്ത് ഓഫ് എ പ്രോജെക്ടില്‍ ഈസ് എ പരാബോള"!. ഇന്നും അന്നും തലയില്‍ കയറാത്ത ഭൌതിക ശാസ്ത്രത്തിന്‍റെ നൂലാമാലകളിലെയ്ക്ക് ഊര്‍ന്നിറങ്ങുന്ന പ്രൊഫസര്‍ സദാനന്ദനും ഇന്റെഗ്രേഷന്‍, ഫങ്ങ്ഷന്‍ ഇത്യാദി പദങ്ങള്‍ക്കു നമ്മള്‍ വിചാരിച്ച അര്‍ത്ഥങ്ങള്‍ മാത്രമല്ല ഉള്ളതെന്ന് പഠിപ്പിയ്ക്കാന്‍ പാടുപെട്ട കാല്‍ക്കുലസ് പ്രൊഫസര്‍ സുലോചനയും ആയിരുന്നു അന്നത്തെ ഞങ്ങളുടെ ഹിറ്റ് ലിസ്റ്റിലെ മുഖ്യ വില്ലന്‍ കഥാ പാത്രങ്ങള്‍. രാഷ്ട്രീയ പ്രബുദ്ധത തലയ്ക്കു പിടിച്ചു ആഴ്ചയ്ക്ക് ആഴ്ചയ്ക്ക് സമര കാഹളം നടത്തുന്ന നേതാക്കന്മാരോട് ഞങ്ങള്‍ക്ക് അതിര് കവിഞ്ഞ ഇഷ്ടമായിരുന്നു. ചൊവ്വ ആഴ്ചയിലേയും വെള്ളി ആഴ്ചയിലേയും രണ്ടാമത്തെ പീരീഡ്‌ കഴിഞ്ഞുള്ള സ്വയം പ്രഖ്യാപിയ്ക്കുന്ന അവധികളും വിദ്യാര്ത്ഥി നേതൃത്വം കനിഞ്ഞു നല്കുന്ന അവധികളും മാത്രമായിരുന്നല്ലോ ആകെയുള്ള കൈമുതല്‍!.

ഗോവിന്ദാപുരം- തൃശൂര്‍ റൂട്ടിലൂടെ ഇഴഞ്ഞു നീങ്ങുന്ന "എന്‍ ടി പി" ബസ്സിലെ വയസ്സനായ ഡ്രൈവറെ പ്രാകി തമിഴനായ കണ്ടക്ടരുമായി സി ടി യ്ക്ക് വേണ്ടി (കണ്‍സ ഷന്‍ ടിക്കറ്റ്) വഴക്കിട്ടു ടൌണിലെ സിനിമ കൊട്ടകയിലെതുമ്പോഴെയ്ക്കും ഉച്ച പടം തുടങ്ങി കാണും. ഭാഗ്യവശാല്‍ കെ എസ് ഗോപാലകൃഷ്ണന്റെ കാനന സുന്ദരി ആയാലും ബ്രുസ് ലീ യുടെ എന്റര്‍ ദ ഡ്രാഗണ്‍ ആയാലും സിനിമയുടെ ആദ്യത്തെ പത്തു മിനിട്ട് ന്യൂസിനുള്ളത് ആയിരുന്നു. സ്വര്‍ണ കടകളും തുണി കടകളും നാമ മാത്രമായിരുന്ന ആ നാളുകളില്‍ ദേശ സ്നേഹത്തെ കുറിച്ചും സ്വാതന്ത്ര്യ സമരത്തെ കുറിച്ചും ജനങ്ങള്‍ക്ക്‌ ബോധവല്‍ക്കരണം നടത്താന്‍ പത്തു പതിനഞ്ചു മിനിട്ട് സിനിമ തീയേറ്റര്‍ ഉപയോഗപ്പെടുത്തിയ "കാലഹരണപ്പെട്ട പുണ്യ വാളന്‍" മാരായ സിനിമ നിര്‍മിതാക്കളെ/തീയേറ്റര്‍ ഉടമകളെ നിങ്ങളുടെ രാജ്യ സ്നേഹത്തിനു മുമ്പില്‍ ഒരു തുള്ളി കണ്ണീര്‍ ഇപ്പോഴെങ്കിലും പൊഴിയ്ക്കട്ടെ!

കലാലയങ്ങള്‍ എത്ര മാത്രം രാഷ്ട്രീയ-വര്‍ഗീയ വല്ക്കരിയ്ക്കപ്പെട്ടു എന്നതിന് മദ്രാസ് ലോ കോളേജിലെ നവംബര്‍ പന്ത്രണ്ടാം തിയതിയിലെ സംഭവം ഉത്തമ ദൃഷ്ടാന്തം ആയിരിയ്ക്കെ, ചുവപ്പും ഖദറും കാഷായവും പച്ചയും സ്വന്തം ഇസങ്ങളെ പരിപോഷിയ്ക്കാന്‍ രക്ത കുരുതി നടത്തി മനുഷ്യ മൃഗങ്ങള്‍ ആയി അധപതിയ്ക്കവേ, അവയില്‍ നിന്നെല്ലാം അകന്നു, അപരന്നു സുഖം കൊടുത്തില്ലെങ്കിലും ദുഃഖം കൊടുക്കാതെ, ഒരു കോപ്പ കള്ളിലും കപ്പയിലും കുറച്ചു മദാലസ സിനിമകളിലും കലാലയ ജീവിതം അവസാനിപ്പിയ്ക്കുന്ന വിദ്യാര്‍ത്ഥി സമൂഹമേ നിങ്ങള്‍ നിങ്ങളുടേതായ ലോകത്ത് വിഹരിയ്ക്കുക, നിങ്ങളുടെ നിഷ്കളങ്കമായ ഇളം മനസ്സുകളില്‍ വിദ്വേഷത്തിന്റെ, വിപ്ലവത്തിന്റെ, വര്‍ഗീയതയുടെ വിഷ വിത്തുകള്‍ പാകാന്‍ ഒരു പ്രത്യയ ശാസ്ത്രത്തിനും ഇടം കൊടുക്കാതിരിയ്ക്കുക.

പട്ടിണി മൂലം, പരിഷത്തിന്റെ മഹദ് വചനങ്ങളില്‍ ആകൃഷ്ടനായി, പുസ്തകം കൈയ്യില്‍ എടുത്തിരുന്നെന്കില്‍ ഈയുള്ളവന്‍ പോക്കെറ്റില്‍ ഒരു ബിരുദവുമായി ഏതെങ്കിലും ഒരു പ്രത്യയ ശാസ്ത്രത്തിന്റെ മണ്ഡലം/ബ്രാഞ്ച് കമ്മറ്റി ലേബലില്‍ ആണവ ഊര്‍ജ്ജതിനെതിരെ പട നയിച്ചേനെ! പഠിയ്ക്കാതെ, പോരാടാതെ (പഠിയ്ക്കുക, പോരാടുക! - എസ് എഫ് ഐ മുദ്രാവാക്യം) തക്ക സമയത്തു ദൈവത്തിന്റെ സ്വന്തം നാട്ടില്‍ നിന്നു യാത്രാമൊഴി ചൊല്ലിയത് കാരണം, ഇന്നു ആണവ ഊര്‍ജ്ജ വകുപ്പില്‍ തന്നെ തൊഴിലുമായി പോക്കറ്റില്‍ ബിരുദം ഇല്ലെങ്കിലും ജീവിയ്ക്കുന്നു. ദൈവത്തിനു സ്തുതി!