കേഴുക മമ പ്രിയ നാടേ!

എന്താണ് നടക്കുന്നത് നമ്മുടെ നാട്ടില്‍? ആരാണ് ഇതിന് ഉത്തരവാദി? കമ്മ്യുണിസ്റ്റ്കാരോ കോണ്ഗ്രസ്കാരോ ബ ജ പ കാരോ മുസ്ലിംലീഗോ? ഇതിലൊന്നും പെടാത്ത ബഹുഭൂരിപക്ഷം എത്ര നാള്‍ ഇങ്ങനെ മൌനം പാലിയ്ക്കും? പത്രങ്ങള്‍ മുഖപ്രസംഗം എഴുതിയാല്‍ അവരുടെ കടമ തീരുന്നു. രാഷ്ട്രീയകാരും എഴുത്തുകാരും സംഭവങ്ങളെ ശക്തമായ ഭാഷയില്‍ അപലപിയ്ക്കുന്നു. സംഗതി ശുഭം. അടുത്ത ഹര്‍ത്താല്‍ വരെ, കുട്ടി ആസ്പത്രിയില്‍ അമ്മയെ കാണാതെ മരിയ്ക്കുന്നതുവരെ, പൊതുമുതല്‍ ബന്ദനുകൂലികള്‍ തീ വെച്ചു നശിപ്പിയ്ക്കുന്നതുവരെ നമ്മള്‍ വിദ്വാന്മാര്‍ക്ക് മൌനം ഭൂഷണം! മലയാളിയിലെ മനുഷ്യന്‍ അനുദിനം മരിച്ചുകൊണ്ടിരിയ്ക്കയാണ്. നാടന്‍ കള്ളും കപ്പയും ബ്രാണ്ടിയുമായി മലയാളി ബന്താഘോഷം അടിച്ച് പൊളിയ്ക്കുകയാണ്. വഴിയില്‍ വാഹന അപകടത്തിനു ഇര ആയവരെ കണ്ടാല്‍ മലയാളി കാണാതെ പോകുന്നു. ഭാര്യ കുട്ടികള്‍ പിന്നെ ഞാനും അതാണിപ്പോള്‍ മലയാളിയ്ക്ക് ലോകം. ഹര്‍ത്താല്‍ സമയത്തു ചീട്ടുകളി, മദ്യസേവ, മഹിഷ സേവ .... ആനന്ദ ലബ്ദിയ്ക്ക് ഇനിയെന്ത് വേണം? ഉയര്‍ന്ന സാക്ഷരത, ഉയര്‍ന്ന ചിന്ത, വികസിത രാജ്യങ്ങളോട് കിട പിടിയ്ക്കുന്ന ആരോഗ്യ-വിദ്യാഭ്യാസ മേഖലകള്‍ , മഹത്തായ പൈതൃകം, ആദി ശങ്കരനെ ജനിപ്പിച്ച മണ്ണ് ...... ഈ നേട്ടങ്ങള്‍ എല്ലാം നമ്മള്‍ കളഞ്ഞു കുളിയ്ക്കയാണോ? സ്വാമി വിവേകാനന്ദന്റെ ഭ്രാന്താലയം പുനര്‍ജനിയ്ക്കയന്നോ? ബന്ദുകള്‍ക്കും സമരങ്ങള്‍ക്കും അപ്പുറം ഒരു ലോകം ഉണ്ടെന്നും അവിടെയും മനുഷ്യര്‍ ജീവിയ്ക്കുന്നുന്ടെന്നും മലയാളി
എന്ന വിപ്ലവകാരിയ്ക്ക് അറിയാന്‍ പാടില്ലേ? ഗള്‍ഫ് നാടുകളില്‍ , രാജ്യത്തിന്റെ പല ഭാഗങ്ങളില്‍ ലോകത്തിന്റെ ഓരോ കോണിലും അങ്ങ് ചന്ദ്രനില്‍ ചായക്കട വരെ നടത്തുന്ന മറുനാടന്‍ മലയാളീ, നീ വേഗം നാട്ടിലേക്കു തിരിയ്ക്കുക, നിന്റെ നാടു കത്തി എരിയുന്നു, കപട കാഷായ, കാവി ചുവപ്പ് ഖാദര്‍ പ്രത്യയ ശാസ്ത്രങ്ങളില്‍ നിന്നും നിന്റെ പ്രിയപ്പെട്ട നാട്ടിനെ രക്ഷിയ്ക്കാനുള്ള ചരിത്രപരമായ ദൌത്യം നീ ഏറ്റെടുക്കുക. നാടിനെ രക്ഷിയ്ക്കാന്‍ ദൈവത്തിനു പോലും ആവില്ലെന്ന് പരിതപ്പിച്ച നീതി ന്യായ കോടതിയെ കൊഞാനന്മാരുടെ ഭരണകൂടത്തെ , കപടസ്വമിമാരുടെ ഉപജാപക വൃന്ദത്തെ നീ എന്ന പരശുരാമന്റെ രണ്ടാം വരവ് അറിയിയ്ക്കുക. നിഷ്പക്ഷവും നിരാലംബരുമായ ഒരു ഭൂരിപക്ഷം നിന്റെ രണ്ടാം വിമോചനസമരത്തിന് എല്ലാ ഭാവുകങ്ങളും നേരുന്നു. നിനക്കു നല്ലത് വരട്ടേ, നിന്റെ നാടിനും!